KORONADAL CITY – Ginbawian sang kabuhi ang isa ka estudyante matapos nga makuryente samtang nagaobra sa likod nga bahin sang isa ka restaurant sa Barangay Zone 2, Koronadal City.
Ginkilala ang biktima nga si John Jaymark Layo, 19-anyos nga residente sang Purok Aquino, Barangay Concepcion, Koronadal City.
Naguwa sa imbestigasyon sang mga otoridad nga samtang ginakay-o ni John Mark kag sang utod sini ang hardiflex sa ibabaw sang kisame, hinali na lamang nga natiphag ang ginapatungan nila nga steel kag nagdiritso tupa sa saksakan.
Nahulog ang biktima kag utod sini apang nagdiritso si John Mark sa steel nga yara sa saksakan nga gintunaan sang kamatayon sini.
Gindala pa sa hospital ang biktima apang gindeklarar ini nga dead on arrival na.
Si John Mark isa ka criminology student kag rank 3 awardee sa reserve Officers Training Corps (ROTC) sa ila nga buluthuan.
