KORONADAL CITY – Halos napanagtag na ang mga relief goods ukon food packs sa nagkalain-lain nga barangay sa siyudad sang Koronadal nga nangin apektado sang El Nino phenomenon.
Ini ang ginpahayag ni Mayor Eliordo U. Ogena sa interview sang Bombo Radyo Koronadal.
Apang, suno kay Mayor Ogena may nabilin pa nga barangay nga wala mapanagtag bangud nakaangkon sang problema sa listing sang mga benepisaryo kasubong sang Barangay Topland, apang ginakay-o na ini agud mapanghatag sang alalangay sa mga benepisaryo nga nagakinahanglan sang ayuda labi na ang mga mangunguma kag mamumugon.
Nahibaluan nga may reklamo sa listahan sang mga benepisaryo sa nasambit nga barangay bangud sa may mga wala suno pa nalista nga indibidwal nga dapat makabaton sang bugas kag de-lata.
Kaangot sini, nanawagan man ang alkalde sa mga wala pa makabaton nga wala nalakip sa listahan nga magpadulong na lamang sa Community Affairs Office kag CDRRMO sa city hall agud nga ma-validate kag mahatagan sang food packs. Ini bangud sa isyu nga wala malista sang Barangay Kapitan bangud indi niya ini tawo ukon supporter.
Nahibaluan nga nagpain ang siyudad sang Koronadal sang nagakaigo nga pundo para sa masobra 25,000 ka mga residente sa 27 ka barangay nga nangin apaktado sang El nino phenomenon.
Ginpasiguro man sang opisyal nga ang mga deserving nga residente sang siyudad ang nakabaton sang ayuda bangud sa validation nga ginpatigayon sang City Disaster Risk Reduction and Management Office (CDRRMO).
