KORONADAL CITY – Boluntaryo nga nagbalik sa sabak sang gobyerno ang tatlo ka katapu sang komunista nga grupo nga New Peoples Army (NPA) sa Brgy. Tibpuan, Lebak, Sultan Kudarat.
Ini ang ginpahayag ni Capt. Elvis Dela Cruz, CMO sang 603rd Brigade, Philippine Army sa interview sang Bombo Radyo Koronadal.
Suno kay Dela Cruz, ang mga nagsungka nga mga rebelde ang ginalakipan sang isa ka squad leader sang Dabu-Dabu Platoon sang Region Sentro De Grabedad (RSDG) gikan sa Far South Mindanao Region (FSMR).
Magluwas sini, nagsungka man ang duha pa ka katapu sang Platoon Baghdad kag Platoon Beijing sang nasambit nga grupo.
Kadungan nga ginsungka sang mga ini ang ila tagsa ka mga armas nga ginalakipan sang M60 machine gun kag duha ka garand rifle.
Nagdesisyon nga magsungka ang mga ini bangud luyag nila nga malimpyuhan ang ila pangalan sa pagkaimplikar sa komunista nga grupo.
Nabalaka man sila sa ila kaluwasan sa nagapadayon nga decisive military operation, law enforcement operation kag intelligence operations rason nga nagdesisyon nga magsungka na lamang.
Magluwas sini nakapoy na suno pa sila kag ginagutom sa pagpanago sa kabukiran kag ginakahidlawan na nga makaupod ang ila pamilya sa patag kag makapangabuhi sang matawhay.
Kaangot sini, nanawagan naman ang military sa nabilin pa nga mga terorista sa kabukiran nga magsungka naman kag ibandonar na ang armado nga pagpakig-away sa gobyerno.
