KORONADAL CITY – Isa ka 9-anyos nga bata ang ginbawian sang kabuhi bangud sa dengue sa siyudad sang Koronadal samatang napagkit naman ang talalupangdon nga 70% nga pagtaas sang kaso sang nasambit nga balatian.
Ini ang ginpahayag ni Ms. Mylene Siliote, HEPO ng City health Office sa interview sang Bombo Radyo Koronadal. Suno kay Seliote, nakapagkit na sang 81 dengue cases ang City Epidemiology and Surveillance Unit ng City Health Office gikan sang bulan sang Enero tubtob sin inga Pebrero, 2024. Mas mataas ini sang 70% kun ikumparar sa napagkit nga numero sang kasubong nga bulan sang tinalikdan nga tuig 2023 nga may yara lamang sang 24 dengue cases.
Ang napatay nga bata ang nagikan sa Brgy. Carpenter Hill subong lamang nga bulan kun diin nagpatigayon sang tikang ang mga otoridad agud nga mapunggan ang paglapta sini. Pila sa mga barangay nga may mga kaso sang dengue ang ginalakipan sang Brgy. Topland nga yara sa 17 cases, ginsundan sang Barangay Zone IV nga yara sa 13 cases kag Brgy. GPS nga may 9 ka mga kaso.
Kaangot sini, nagpahanumdom ang City Health sa publiko nga ang pinakamaayo nga paagi agud matapna ang dengue amo ang masami nga paglimpyo sa palibot. Sa karon, nagapanawagan ang talatatapan sa sin-u-man nga may sintomas sang dengue kasubong sang hilanat nga gilayon magpakonsulta agud nga mabulong kag indi na maglala pa.
