Nagapanawagan sa karon ang Department of the Interior and Local Government region 12 sa mga nabiktima sang suspek nga magpasang-at sang kaso batok naman sa isa ka suspek nga scammer nga nagapangolekta sang kwarta sa mga magakuha sang Civil Service Exam.
Sa interbyu sang Bombo Radyo Koronadal kay Mr. Arthur Condes, Information Officer DILG-12, ginpahayag sini nga ang ila nga talatapan man ang gingamit sang suspek nga ginkilala kay Kenneth H. Eliver, residente sang Purok Andam, Barangay Cinco, Banga, South Cotabato.
Suno sa opisyal, naga padulong ang suspek sa ila nga talatapan para magpakuno-kuno nga nagatrabaho sa amo nga departamento.
Isa ini ka pamaagi sang suspek agud makakolekta sang kwarta ilabi na sa mga naga proseso kag madamo pa. Luwas sa DILG 12, gingamit man sang suspek ang talatapan sang Napolcom, PDEA , LTO 12 kag madamo pa.
Sa karon yara na ini sa kostudiya sang Koronadal City PNP para sa nagakaigo nga kaso nga ipasang-at batok sa iya. Kung madumduman, una naman nga gin-interview sang Bombo Radyo ang isa ka estudyante nga ginscam sang suspek.
Suno pa sa iya, nagapangolekta ang suspek sang kwarta sa baylo nga siya ang magproseso sang mga requirements para sa CSE kag makapasar pa ang mga ini.
Sa karon, nagapangabay ang DILG 12 nga kung mahimo mapadasig ang kaso nga isang-at sa suspek agud nga mabayadan niya ang iya nga ginhimo nga pagpanunto.
