Nagapadayon sa karon ang monitoring sang OCD 12 makaligad ang pipila ka mga serye sang pagbaha nga naeksperyensyahan sa rehiyon dala sang sunod-sunod nga pagbuhos sang ulan sa lugar.
Sa interbyu sang Bombo Radyo Koronadal kay Ms. Joeremae Balmediano, OCD 12 Information Officer, ginpahayag sini nga padayon pa nila nga gina-validate tubtub sa karon ang mga lugar nga naapektuhan ilabi na sa tatlo ka probinsya nga amo naman ang North Cotabato, Cotabato kag South Cotabato.
Ginpahayag sini nga nakig-angot na sila sa tagsa-tagsa ka mga local Disaster Risk Reduction and Management Offices (DRRMOs) agud mahibaluan kung tuman gid man bala ang damage kag pagpanalasa sang pagbaha.
Ginpahayag naman sini nga diri sa South Cotabato, ang apektado nga mga lugar amo ang banwa sang Tantangan kag siyudad sang Koronadal.
Suno sa iya, nakaeksperyensya sang kalamidad ang rehiyon bangud naman sa dala sang Southwest Monsoon nga sa karon padayon nga ginapahalong ang tanan agud nga makalikaw sang malala nga sitwasyon dala sang malain nga panahon.
Nagapanawagan naman ini sa tanan nga padayon nga mangin vigilante ilabi na sa mga lugar nga ginakonsidera nga prone sang pagbaha o kun landslide.
