KORONADAL CITY- Nagapadayon sa karon ang imbestigasyon sang mga otoridad sa nagluntad nga pagpangluthang sa duha ka mga manunudlo sa Pikit, Cotabato nga kung sa diin ginkapatay sang isa kag ginkapilas naman sang isa pa.
Ini ang nangin kumpirmasyon ni P/Lt Col. John Miridel Calinga, Hepe sang Pikit MPS, sa interbyu sang Bombo Radyo Koronadal.
Suno sa iya, ang napatay ang ginkilala kay Joel Reformado, 36-anyos, elementary teacher sa Damalasak Elementary School, samtang padayon naman nga nagapaayo sa karon sa balay-bulungan ang 37-year-old nga upod sini nga si Elton John Lapined, nga manunudlo sa Mapagkaya Elementary School kag lunsay mga resident sang Poblacion sa nasambit nga banwa.
Nagbayhe na kung tani papuli ang nasambit nga mga biktima sang hinali na lamang nga gintambangan ini sa atubang sang Manaulanan Elementary School sang wala pa natumod nga riding-in-tandem suspect.
Sa karon, mas gina paid-idan pa ang imbestigasyon agud mahibaluan ang matuod-tuod nga motibo sa krimen.
Nakaangkon suno pa sang gunshot wound sa ulo kag sa nagkalin lain nga bahin sang lawas si Reformado nga amo ang rason sang gilayon niya nga kamatayon.
Ginpasiguro naman ni Calinga nga mahatagan sang nagakaigo nga seguridad ang pamilya sang mga biktima.
Nakuha suno pa sa crime scene ang 10 basyo sang bala sang caliber 45. mm kag duha ka bala.
Nagapadyon naman ang hot pursuit operation sang Pikit MPS sa mga suspek nga gilayon nga nakapalagyo sa wala nahibaluan nga direksyon.
