KORONADAL CITY- Isa sa pinaka-importante nga balaan nga adlaw sa liturhikal nga kalendaryo ang Ash Wednesday ukon Myerkules de badlis.
Sa interview sang Bombo Radyo kay Father Angel Buenavides — Vicar General , Diocese of Marbel iya ginpahayag nga ang Ash Wednesday amo ang nagabukas sang kwaresma sa diin ini amo ang panahon sang pagpuasa kag pagpangamuyo nga nagapreparar sa mga tawo sa pagkabanhaw ni Hesukristo kag sa sini nga pamaagi, maangkon ang kaluwasan.
Suno sa iya, ang Ash Wednesday ang gina-obsebar 46 ka adlaw antes ang Easter Sunday, kag ini ang gina-obserbar sang mga Katoliko kag iban man nga mga Kristyano.
Ang Ash Wednesday ang naghalin sa dumaan nga Jewish tradition sang paghinulsol kag pagpuasa.//Ini nga practice ang nagalakip sang pagbutang sang abo sa agtang.
Ang abo amo ang nagasimbolo sang yab-ok nga amo ang gin-gamit sang Diyos agud mahuman ang mga tawo.
Samtang ginapahid sang pari ang abo sa agtang sang tawo, ginamitlang niya ang tinaga nga : “Remember that you are dust, and to dust you shall return.”
Ginpahayag pa sini nga gina-obserbar subong nga adlaw ang fasting ukon pagkaon sang katunga lamang sa nakaandan nga pagkaon kag abstinence ukon paglikaw sa pagkaon sang ano man nga sahi sang karne.
Ang fasting suno sa iya kag abstinence indi lamang isa ka sahi sang pagpenetensiya apang ini man ang nagapahanumdom sa pagpamalandong sang ispiritual nga pagpangabuhi.
Nagpahanumdom man siya sa publiko nga ang pag-obserbar sang ash wednesday indi lamang matapos sa pagpabadlis ukon pagpabutang sang abo sa agtang.
Nagakadapat suno sa iya, mangin ‘lifestyle’ ang pagpangamuyo kag pagsakripisyo sa pagpangayo sang kaayuhan para sa pagpangabuhi ukon para sa kadam-an.
Dugang pa sang natungdan, kuntani wala nagadulog ang pag-obra sang maayo sa kwaresma kundi sa adlaw adlaw nga tanan.
