KORONADAL CITY – Dead on arrival sa balay bululngan ang isa ka Barangay official makaligad nga maulamid ini sa isa ka vehicular accident sa bahin sang kalabaon sang national highway sa Brgy. Saravia, Koronadal City pasado alas 11:30 sang aga.
Ini ang ginkumpirmar ni Brgy. Kapitan Gregorio Presga sang Barangay Saravia sa interview sang Bombo Radyo Koronadal.
Suno kay Kapitan Presga, ginakasubo sini ang nagluntad nga pagkaulamid sang isa sa iya nga mga kagawad sa isa ka vehicular accident.
Ginkilala sang opisyal ang napatay nga Brgy. Kagawad Marcelino Perez.
Dugang pa ni Presga, halin ang kagawad sa ila nga session sang nagluntad ang aksidente para kuntani nga maglakat sa paryente sini.
Samtang paliko na ang motorsiklo sang kagawad sa dalan, nadalasa ini sang nagahagunos nga elf truck nga may plakang LEZ-516.
Nakaangkon sang fatal nga pilas ang opisyal sa nag kalain-lain nga bahin sang iya nga lawas.
Madasig namn nga gindangat ini sa pinakamalapit nga balay-bululngan apang wala na ini nahingagaw pa nga buhi.
Samtang, nagsungka naman sa mga otoridad ang driver sang elf-truck sa Koronadal PNP traffic.
Magapadayon naman ang imbestigasyon sang mga otoridad sa nagluntad nga insidente.
