KORONADAL CITY – Duha ang pilason sa pagsigabong sang IED sa back seat sang isa ka unit sang Yello Bus Line Incorporated (YBL) samtang yara sa Aquino St. corner Gensan Drive, Koronadal City alas-12:30 kaina sang udto.
Ini ang ginpahayag ni Police Col. Nathaniel Villegas, provincial director ng South Cotabato sa interview sang Bombo Radyo Koronadal.
Suno kay Villegas, ginahibalo pa sa karon kun ano nga sahi sang IED ang nagsigabong sa ulihi nga bahin sang bus nga may plate number MWB 276 kag may body number 2108.
Luwas naman ang driver, konduktor kag apat ka pasahero nga sakay sang bus apang ang duha ka tricycle driver nga nagasunod sa bus ang naigo sang shrapnel sa pagsigabong sang bus.
Sa karon, indi pa matumod sang kapulisan kung ano ang motibo sang pagpasigabong kag kun sin-o ang responsable nga grupo.
Ginahibalo pa man sang EOD team ang sahi sang IED kag kun kay sin-o nga signature ini.
Kakulba sa karon ang ginabatyag sang mga pasahero nga sakay sang YBL bus.
Suno kay Nanay Rose, isa sa mga pasahero halin sila sa siyudad sang Kidapawan, naghapit sa siyudad sang Tacurong upod ang 3 pa ka pasahero padulong diri sa siyudad sang Koronadal.
Pag-abot sa atubang sang KCC Mall hinali na lamang ini nga nagsigabong.
Suno kay Nanay Rose, sa exit pa lamang sang Tacurong City, sa bahin sang Cale-an may nakita ang kondoktor nga isa ka Eco bag nga may unod nga Sapatos apang mabug-at.
Ginpamangkot suno pa sang kondukto kun sin-o ang nagapanag-iya sang bagahe apang wala sang may nag-ako rason nga ginhaboy niya ini sa kilid sang dalan samtang nagadalagan ang bus.
Hugot nga ginakundenar sang pamunuan sang Yellow Bus Line Incorporated (YBL) ang pagpasigabong sa isa nila ka unit.
Wala naman suno pa sang may nabaton nga threat ang bus company antes pa man ang pagsigabong.
