KORONADAL CITY- Ginmanduan sang Taliban ang mga kababainhan nga Afghan TV presenters nga tabunan ang ila nawong samtang yara sa kahanginan.
Ini ang nangin kumpermasyo ni Bombo Joel Tungal, BINC to Afghanistan sa interview sang Bombo Radyo Koronadal.
Suno sa iya ang nasambit nga pagsulundan sumugod duha ka semana ang nakaligad pagkatapos nga ginpalab-ot sa tanan nga mga babayi nga magsuksuk sang tabon kun yara sa pampubliko nga lugar ukon pagasilutan ang ila nga nawong, ini ang suno sa isa ka religious police spokesman.
Dugang pa sini hugot subong ang pagdumili sa kababahin-an, nga magbyahe kun wala sang kaupod nga paryente nga lalaki kag ginpasara man ang mga buluthoan pangsekondarya para sa mga babayi.
Ini matapos mabalik sa Taliban ang kontrol sadtong Agosto tubtob subong nga bulan, naghatag ang mga ini sang mga layi kun ano lamang ang pwede pagasuksukon sang mga babayi.
Wala sang ginapili ang ini nga pagsulundan kag ang tanan nga babayi ang nagakadapat nga tabunan ang nawong kalakip na ang yara sa media outlets sa Afghanistan.
Dugang diri ang motibo sang Taliban sa pagpatuman sang mga layi, amu ang makahimo sang luwas nga palibot kun sa diin ang katinlo kag dignidad sang mga babayi ang sa liwat mabalik kag magpakabalaan.
