KORONADAL CITY – Nagapadayon sa karon ang imbestigasyon sang mga otoridad sa nagluntad nga pagpangluthang patay sa tatlo ka katapo sang Barangay Peacekeeping Action Team samtang naka onboard sang Barangay Patrol vehicle kag nakaparking sa atubangan lamang sa buluthuan sa Barangay Poblacion, Buluan,Maguindanao. Ginkilala ni Police Lt.
Col. Cemefranco Cemacio, COP sang Buluan PNP ang mga napatay nga sanday Misuary Dimapalao, Sajid Kamama kag Tata Bulilo samtang isa naman ang napagkit nga pilason nga ginkilala kay Jadid Ulangkaya.
Suno kay Cemacio, samtang sakay sang Barangay Patrol ang mga biktima sang ginpangluthang ini sang wala pa natumod nga mga suspek usar ang M-16 Armalite Rifle samtang yara sa atubang sang isa ka Voting Center sa nasambit nga banwa.
Apang suno naman sa pahayag ni anay Buluan Mayor Jhong Mangudadatu antes pa man ang nasambit nga pagpangluthang sa mga BPAT ang ginpaulanan man sang bala ang ila nga balay nga lapit man sa nasambit nga buluthuan.
Sa karon nagpadala na ang Police Regional Office BAR sang dugang nga pwesra sa lugar agud mapabilin ang peace and order bangud sa nagluntad nga insidente. Ginahibalo pa man sang PNP ang motibo sang pagpangluthang apang dako ang pagpati sang pamilya Manguddatu nga pulitika ang motibo sang nagluntad nga krimen.
Madumduman nga ang banwa sang Buluan Maguindanao ang isa sa anom nga munisipyo sa Maguindanao ang ginpaidalom sa Comelec Control.
