KORONADAL CITY – Nagresulta sa trahedya subong nga Semana Santa ang family outing sang isa ka pamilya nga sakay sang pampasahero nga Van matapos nga mainvolbar sa isa ka aksidente sa dalanon sa Esperanza, Sultan Kudarat batuk sa isa ka cargo truck sang J&T Express nga nagresulta sa pagkapatay sang anum (6) ka indibidwal kag pagkapilas naman sang siyam ka iban pa.
Ini ang ginpahayag ni Ms. Nory Joy Amular, himata sang mga biktima sa eksklusibo nga interbyu sang Bombo Radyo Koronadal.
Ginkilala ang mga napatay nga sanday Nora Amular, 48 years old; Lilibeth Gepolungca Amular, 52 years old; Roger Amular, 48 years old; Dhen Allen Amular, 10 years old; Ricky Gepolungca 45 years old kag Khyn lester Gepolungca ,15 years old nga lunsay mga residente sang Barangay Dukay, Esperanza, Sultan Kudarat.
Samtang ang siyam nga mga pilason ang gindala sa pinakamalapit nga hospital lakip na ang driver kag pahinante sang cargo truck.
Suno kay Nory Joy, papuli na sa ila lugar gikan sa General Santos City matapos mag-night swimming ang mga biktima sang pag-abot sa bahin sang boundary sang Dukay kag Laguinding sa banwa sang Esperanza, Sultan Kudarat, nakasugata sang mga ini ang madasig nga cargo truck.
Wala na nakalikaw pa ang driver sang Van rason nga nakaakong sang head on collision ang duha ka salakyan.
Sa kadasigon sang mga ini kag kabaskog sang impact sang pagbungguanay halos wasak ang atubangan nga bahin sang Van samtang kasubong nga magseparar na ang ulo sang cargo truck sa lawas sini.
Dead on the spot ang tatlo ka sakay sang Van lakip na ang driver samtang napatay naman sa hospital ang 3 ka iban pa.
Sa subong, nagaapela ang pamilya sang mga biktima nga sabton sang J&T express ang responsibilidad sa mga napatay kag napilasan.
Kadungan man sini, nagapanawagan naman sang bulig ang pamilya sang mga napatay sa pagpalubong sa mga ini.
Nagpahanumdom naman ang mga otoridad sa Esperanza, Sultan Kudarat nga maghalong ang tanan nga mga motorista labi na sa mga nagamaneho subong nga Holy Week agud nga malikawan ang liwat nga trahedya sa dalanon.
