Patay ang isa ka 1-anyos nga bata matapos mahulog kag malumos sa irrigation canal sa Purok Baras 2, Barangay M. Roxas, banwa sang Sto. Niño, South Cotabato sang Huwebes sang aga, Nobyembre 19, 2026.
Ginkilala ang biktima sa alyas nga “Junjun,” 1 ka tuig kag 5 ka bulan ang edad kag residente sang nasambit nga lugar.
Sa exclusive interview sang Bombo Radyo Koronadal kay PMaj Jerald F. Gervacio, Chief of Police sang Sto. Niño Municipal Police Station, ginpahayag sini nga base sa inisyal nga imbestigasyon sang kapulisan, ginasunod sang bata ang iya tiya nga nagapadulong sa uma sang natabo ang aksidente.
Suno kay Gervacio, posible nga wala namalayan sang bata ang peligro kag nahulog ini sa irrigation canal nga yara sa ila ginaagyan.
Bangud sa insidente, gilayon nga ginhatagan sang nagakaigo nga aksyon ang bata, apang wala na ini nakaluwas.
Samtang, nagapadayon ang pag-usisa sang kapulisan sa mga detalye sang insidente agud mahibaluan ang bug-os nga sirkumstansya sang natabo.
Sa pihak sini, ginapahanumdom ang mga ginikanan kag manug-atipan nga tutukan ang mga kabataan, ilabi na kun yara sa mga lugar nga malapit sa irrigation canals, suba kag iban pa nga katubigan agud malikawan ang kaangay nga trahedya.













