KORONADAL CITY-Patay na sang masapwan sa ila sulod sang balay ang mag iloy sa Purok Crossing Laud, Barangay Kalawag 2, Isulan, Sultan Kudarat ini ang ginpahayag ni P/Lt.Col Gary Flor C. Marfil, OIC-COP sang Isulan MPS sa interbyu sang Bombo Radyo Koronadal.
Ginkilala ang napatay nga si Noralyn Delfin Eribal 40 anyos kag ang iya 8 anyos nga bata nga lalaki nga nalakip sa krimen. Suno kay P/Lt.Col Gary Flor C. Marfil nagpangayo sang bulig sa mga kapulisan ang mga kasilingan sang mga biktima makaligad nila nga makita ang mga agi ukon tulo-tulo sang dugo sa garahe sang mga ini, sang indi na makuntak ang biktima nga si Noralyn sa iya nga cellphone kag sarado ang ila nga garage gate, ginguba nalang ini kag ginpilit nga sinulod sang iya kasilingan.
Kaupod suno pa sang barangay official sa lugar kag nag responde ang katapo sang mga otoridad kag didto nasapwan ang duguon nga biktima nga si Noralyn nga wala na sang panaptun sa iya nga kwarto.
Samtang sa pihak kwarto nakita ang bata nga lalaki sini nga nakaangkon man sang madamo nga pilas sa nagkalain lain nga parte sang iya lawas bangud sa buno. Dako man ang pagpati sang hepe nga indi lang isa ukon duha ang may kahimuan sa nasambit nga panghilitabo nga brutal nga pagpatay sa mga biktima.
Sa karun pagpangawat ang motibo nga nakit-an sang mga kapulisan sa krimen bangud may mga nagkadula nga mga kagamitan sa sulod sang puluy-an sang biktima. Nahibaluan nga duwa lamang ang mga biktima sa sulod sang ila nga panimalay sang mag luntad ang nasambit nga krimen bangud sa yara sa duty ang bana sini nga isa naman ka suldado.
Samtang naghiwat naman sang post mortem examination ang SOCO agud ma determinar ang posible nga natabo bangud posible nga kilala sang mga biktima ang mga suspek bangud nakasulod ang mga ini.
