KORONADAL CITY – Yara sa kustodiya sa subong sang T’Boli MPS ang isa ka sultero makaligad nga gin aristar sang Barangay Peacekeeping Action Team ukon ang (BPATS) sa Barangay Talcon, Tboli, South Cotabato bangud nga ginpangaluyagan sini ang naka-quarantine nga apo mismo sang kapitan sa nasambit nga lugar.
Ginkilala mismo ni Barangay Chairman Ato Bansawan sang Brgy. Talcon, Tboli, ang suspek nga si Joeramin Salawa ,33 anyos kag residente sa nasambit nga banwa.
Suno sa opisyal, gin pa aristar sini ang nasambit nga sultero bangud nag padulong suno pa ini sa iya nga apo nga bag-o lang nag abot halin sa Maynila kag yara sa isa ka Quarantine facility sa ila nga barangay.
Dugang pa sang kapitan, madamo nga bes suno pa nga nadakpan ini nga naga libot libot sang Quarantine/Isolation Facility sang ila nga lugar guwa sulod sa pasilidad.
Tuman ang kakibot sang kapitan sang nakabaton ini sang text halin sa iya nga apo nga yara sa sulod sang pasilidad nga gin sulod suno kag gintapad ni Salawa samtang naga higda ini sa ulonan nga nangin kabangdanan nga naga sala sala ang lin-ay.
Sa subong, natalana pagasang-atan sang kaso sa pag bayolar sa minimum health protocols sa ila nga banwa ang suspek.
