KORONADAL CITY – Nadugangan pa ang mga nagbalakwit nga pamilya bangud sa malapnagon nga baha nga naeksperiensiyahan subong sa duha ka barangay sa Bagumbayan, Sultan Kudarat.
Ini ang ginkumpirmar ni Barangay Kapitan Anabel Alvero sang Barangay Sison sa interbyu sang Bombo Radyo Koronadal.
Suno kay Alvero, yara sa 25 ka pamilya ang gin-rescue matapos nga naglab-ot tubtob sa hawak ang tubig-baha kag nangin kasubong nga isla ang ila nga lugar sa Barangay Sison.
Samtang, yara naman sa 30 ka pamilya ang ginpadalom sa forced evacuation sa Barangay Biwang bangud man sa pagbaha.
Sa subong, nadugangan pa ang mga nagbalakwit kun diin yara sa masobra 400 ka mga indibidwal ang nagapabilin subong sa evacuation center.
Ekta-ektarya nga mga talamnan sang palay man ang naguba suno sa initial assessment sang MDRRMO.
Nahibaluan nga nag-awas ang tubig sa Allah river rason nga naguba ang dike nga gintunaan sang malapnagon nga baha.
