KORONADAL CITY – Yara na sa kustodiya sang Banga PNP ang suspek sa brutal nga pagpatay sa isa ka mangunguma sa Barangay Rang-ay, Banga, South Cotabato matapos nga naaresto ini sang mga otoridad.
Ginkilala ang biktima nga si Jessie Antonio alyas Toto Ablanida, 38 anyos kag residente man sang nasambit nga barangay.
Sa interbyu sang Bombo Radyo Koronadal kay Police Major Joseph Forro III, hepe sang Banga PNP, bangud sa maidid nga imbestigasyon nga ginpatigayon sang kapulisan kun ngaa natumod ang suspek nga si Merbin Lapitan De Guerto, 38 anyos kag residente sang Purok Magsaysay, Barangay Rang-ay, Banga, South COtabato.
Suno kay Forro, gin-ako mismo sang suspek ang ginhimo nga krimen matapos nga matukiban ang gintago sini nga binangon sang biktima.
Sa eksklusibo naman nga interbyu sang Bombo Radyo sa suspek nga si De Guerto, ginpahayag sini nga nagdulom lamang ang panan-awan sini bangud sa masami nga pagpanghangkat sang away sang suspek sa tion nga mahubog ini kag mag-agi sa ila puluy-an.
Suno kay De Guerto, perwisyo sa nagakatulog ang ginahimo ni Ablanida kag halos na-trauma na suno pa ang mga kabataan sini sa iya masami nga pagpanghangkat sang away.
Sang natabo ang krimen, gab-i sang Pebrero 28, nag-agi si Ablanida sa balay ni De Guerto nga hubog kag nagsinggitan naman sang inaway sang makita ang suspek nga naguwa sa ila puluy-an.
Makapila na ka beses suno pa nga ginhimo ni Ablanida ang pagmaoy sa tion nga mag-agi sa panimalay nila De Guerto rason nga nasupot ang kaakig sang suspek.
Ginhana suno pa nga lab-on ni Ablanida si De Guerto apang bangud nga hubog ini nasarangan sang suspek nga magbato kag ginbuno ini sang makapila ka beses sa dughan kag ginlampusan sang matig-a nga butang ang ulo.
Nagpangayo man sang pasaylo ang suspek sa pamilya sang biktima mangin sa Brgy. Kapitan nga magpatunga sa ila nga pamilya para ma-settle ang nasambit nga kaso.
Sa subong luyag sang suspek nga maabswelto sa kaso bangud ginaulikdan sini ang 6 niya ka kabataan kag asawa.
