KORONADAL CITY – Ginpaidalom sa localized lockdown ang yara sa pito ka mga barangay sa siyudad sang Tacurong matapos nagsaka ang kaso sang COVID 19.
Sa eksklusibo nga interbyua sang Bombo Radyo Koronadal kay Dr. Jiovenni Denes, City Health Officer sang Tacurong, ginpaidalom sa 21 days quarantine ang mga nagpositibo sa virus mangin ang ila nga nasulapo.
Kalakip sa mga barangay nga ginpaidalom sa lockdown ang EJC Montilla (Prk. Malipayon), New Isabela (Prk. Rosal kag Prk. Sampaguita), San Pablo (Prk. Katilingban, Prk. Maharlika kag Prk. New Negros, Poblacion (Prk 2 kag Prk 1), Griño(Prk. Golden Duranta), Baras (Prk. Summer Snow), New Carmen (Prk. Salukag).
Ginpaathag pa sini ang rason sang pagsaka sang kaso sang COVID 19 sa siyudad bangud sa kadam-an sa mga ini nagpositibo man ang pamilya.
Ginalauman naman nila ang pagdugang pa sang kaso bangud sa panibag-o nga mga swab test nga ila nga ginpasa nga confirmatory test.
Lauman naman daw nga kun mabudlay makontrolar ang pagsaka sang kaso igapaidalom ang siyudad liwat sa General Community Quarantine.
Sa subong, may yara na sang 2 ka panibag-o nga kaso ang napagkit sa siyudad kun diin nagsaka na sa 42 ang total active cases samtang yara naman sa 92 ang nakarecover kag 132 na ang kabug-usan nga kaso sang COVID 19 sa nasambit nga siyudad.
