KORONADAL CITY – Tuman ang kabalaka nga nabatyagan sang asawa sang isa ka manunudlo sa banwa sang Polomolok, South Cotabato makaligad suno pa ini nga ginkidnap sang wala pa nakilal-an nga suspek.
Sa eksklusibo nga interbyu sang Bombo Radyo Koronadal kay alyas Joan, asawa sang biktima nga si Mohamir Adam kag manunudlo sang Poblacion Polomolok National High School, Disyembre 2 sang ulihi ini nga naka-text ang iya nga mister nga magakadto ini sa boarding house sa Manantad halin sa buluthoan bangud may pagapirmahan suno pa ini nga DTR kag pakadto na suno pa ini sakay sa iya Bajaj nga motorsiklo.
Pagsaysay ni Joan, nag-umpisa ang iya kabalaka sang indi na ma-contact ang iya cellphone takna alas 2 sa hapon rason nga ila ini gin-trace kag nakit-an ang signal sini sa Brgy. Aflek sa banwa sang Tboli, gani ginpaagi na nila sa social media ang panawagan sa iya nadula nga tiayon.
Nagalaum ini nga kuntani makabalik nga luwas ang iya tiayon, apesar wala na ang mga kagamitan sini.
Nahibaloan nga apat ka tuig pa lamang nagaupdanay sanday Adam kag Joan kun sa diin may yara sila sang tatlo ka bata nga nagapang-edaron sang 3 anyos, 1 ka tuig kag anom ka bulan nga lapsag.
