KORONADAL CITY – Lima ka balay ang natumbahan sang kahoy tuga sang mabaskog nga hangin nga nagluntad sa Brgy. Topland, siyudad sang Koronadal.
Suno kay kapitan Angelica Bermil sa interbyu sang Bombo Radyo Koronadal, tuman nga nahalitan ang Purok Malipayon kong sa diin nagkalatumba kag nagbalabag ang mga kahoy sa mga dalanon sa nasambit nga dalan, butang nga indi makaagi ang mga salakyan.
Ila ini gilayon nga gin-aksyonan kag nagpatigayon sang cleanup operations agud makaagi sa gilayon ang mga motorista.
Dugang sang kapitana, pagahatagan man nila sang ayuda ang mga tag-iya sang balay nga natumbahan sang kahoy.
Nagpasalamat naman ini nga wala sang may napatay sa nasambit nga kalamidad, kag nagpanawagan nga magpahibalo lamang sa ila talatapan kun sin-o man ang nagapanginahanglan sang bulig kag ila ini pagaaksyonan.
