KORONADAL CITY – Nagapadayon ang ginapatigayon nga damage assessment sang mga municipal disaster risk reduction and management offices sa pila ka bahin sang probinsya sang North Cotabato makaligad nga nakaeksperyensiyar sang tuman nga pagbaha.
Nakapagkit sang insidente sang pagbaha ang mga banwa sang Alamada, Libungan, Aleosan Midsayap, kag Pikit.
Base sa impormasyon nga nakuha sang Bombo Radyo Koronadal, nilibo nga mga residente ang apektado sa nasambit nga mga lugar kun sa diin lubog sa tubig-baha ang kadam-an sa mga ini, labi na sa Alamada.
Gindalasa naman sang nasambit nga kalamidad ang mga humay sa bahin sang Pigcawayan, samtang ginpakigbahin naman sang Midsayap municipal disaster risk reduction management office nga lapaw sa tuhod ang kadalumon sang baha.
Nagbulig na ang provincial government sa mga apektado nga mga residente kun sa diin nagpanagtag na ang mga ini sang pauna nga mga ayuda kag relief goods.
