KORONADAL CITY – Ginalauman nga anuman nga adlaw igapaguwa na sang Sto Nino LGU ang reward money para sa sin-oman nga makatudlo sa mga suspek nga nagpatay kay Mayor Pablo Matinong.
Ini ang ginpahayag ni Sto Nino municipal administrator Jofrey Frenal sa interbyu sang Bombo Radyo Koronadal.
Suno sa opisyal, ginahisgotan pa sa subong ni Mayor Sulpicio Villalobos ang mga tikang nga pagahimoon kaupod ang iya gabinete kag mga kapulisan kaangot sa pagpadasig sang pagresolba sang nasambit nga kaso.
Ginpasiguro man sini nga ginahimo nila ang tanan agud tigayon nga maangkon na ni Mayor Matinong kag sang pamilya ang ginalauman nga hustisya.
Samtang natalana naman sa Agosto 1 ang lubong ni Mayor Abog sa Sto Niño public cemetery kun sa diin halin sa ila panimalay, igadiretso ini anay sa simbahan para sa isa ka misa, dason sa Sto Nino municipal hall para sa dyutay nga programa antes ini nga igahaya sa nasambit nga sementeryo sa iya mausoleum.
