KORONADAL CITY – Tuman nga ginkabalaka kag ginkaalarma sang mga local officials sang South Cotabato ang asud-asod nga mga insidente sang paghikog labi na sa mga menor de edad.
Pinakaulihi diri ang nagluntad sa Brgy. San Isidro sa banwa sang Sto Niño kun sa diin nag-inom suno pa sang herbicide ang 15 anyos nga sulterito makaligad ini nga gin-akigan sang iya amay, suno kay Jofrey Frenal, ang municipal administrator sang Sto Nino LGU sa interbyu sang Bombo Radyo Koronadal.
Dugang sini nga yara sa maayo na nga kahimtangan ang nasambit nga menor de edad samtang nagapaayo sa South Cotabato Provincial Hospital.
Magluwas pa diri, isa ka 16 anyos nga dalagita sa banwa sang Norala ang gin-utas ang iya kabuhi bangud gin-akigan man sang iya mga ginikanan, isa ka 19 anyos nga lalaki nga ginbuno ang iya kaugalingon bangud ginabasola siya sa pagkalutos sa drag race, kag 44 anyos nga lalaki nga isa ka PWD halin naman diri sa siyudad sang Koronadal.
