KORONADAL CITY – Boluntaryo nga nagsungka sa mga otoridad ang 13 ka katapo sang New People’s Army sa probinsya sang South Cotabato, kalakip na ang isa ka vice-commander sang isa ka platoon.
Kalakip ang nasambit nga mga returnees sang Guerilla Front 73 sa idalom sang Far Southern Mindanao Region Committee.
Suno kay South Cotabato Provincial Director Col. Jemuel Siason, nagdesisyon ang mga ini biyaan na ang komunista nga grupo kag magsungka sa mga otoridad sa Brgy. Dumadalig sa banwa sang Tantangan.
Dugang sang opisyal, nakahanda suno pa ang NPA vice-commander nga magtestigo kag isaysay ang ila palangabuhian sa kabukiran antes nagdesisyon nga magpanaog kag magbalik sa sabak sang gobyerno.
Ginpahayag ni Col. Siason nga ginalauman pa nila ang pagdamo sang pagsungka sang mga rebel returnees bangud sa maayo nga mga programa sang gobyerno para sa ila agud mabag-o ang ila kabuhi.
