KORONADAL CITY – Nagainit ang tensyon sa tunga nanday South Cotabato Governor Reynaldo Tamayo Jr. kag South Cotabato Police Provincial Director Police Colonel Joel Limson.
Nag-ibwal ang ginakabig nga war of words sang duha ka matag-as nga opisyal sang probinsya makaligad madakpan ang isa ka wanted person nga si Walter Ozaeta alyas Mike Macalindong nga may kaso nga kidnapping kag involved sa illegal gambling sa Luzon.
Sa interbyu sang Bombo Radyo Koronadal kay South Cotabato Governor Reynaldo Tamayo Jr., gintawag sini nga indi maayo nga opisyal sang kapulisan si Police Col. Joel Limson bangud sa kapaslawan suno pa sini nga i-background check ang wanted person nga si Ozaeta antes ginpahanugutan nga mag-atubang sa iya agud makig-istorya nahanungod sa operasyon sang STL sa South Cotabato kag Sultan Kudarat.
Sabat naman ni PD Limson, may proseso ang pagpaisalom sa background check sa isa ka tawo kag wala niya na ini nahimo bangud legal nga transaksiyon man ang ginpakig-angot sa iya angot sa operasyon sang STL.
Ginhatagan man sini sang punto nga antes pa man ang pagpakig-angot ni Ozaeta sa iya, may komunikasyon na suno pa ang gobernador sa wanted person angot sa operasyon sang STL.
Hugot naman nga ginpanginwala ni Tamayo ang pahayag ni Limson bangud ginainsister sini nga si Limson ang una nga nakakilala kay Ozaeta kag ginpahibalo lamang sa iya.
Nagapanindugan naman si Tamayo nga may mga ebedensiya suno pa ini nga magapamatuod sang komunikasyon nila ni Limson kag wala siya nagabinutig.
Samtang seryoso naman ang nangin akusasyon ni Limson sang korupsiyon kay Tamayo bangud sa paghatag sini sang tag-50mil pesos sa kapulisan kag army nga nag-arestar kay Ozaeta.
Suno kay Limson, wala nagabaton sang reward ukon kwarta ang PNP ukon military bangud trabaho nila nga magdakop sang criminal kag kun kwarta gid man ini sang gobyerno dapat nga mag-agi sa husto nga proseso.
Rason nga ginmanduan sini ang hepe sang Tupi PNP nga si Pol. Major Andres Sumugat nga iuli ang kwarta bangud kun indi pagapasakaan niya ini sang kaso.
Gin-admiter naman ni Tamayo nga naghatag ini sang kwarta sa kapulisan kag military apang nagikan suno pa sa bulsa sini kag wala sang malain sa paghatag reward sa kapulisan.
Bilang balos, gin-akusaran naman ni Tamayo si Limson nga nagabaton sang tubtob P50mil kada bulan gikan sa STL operatos nga si Ozaeta.
Samtang, ginatindugan naman ni Limson nga antes pa man natabo ang pagpadakop kay Ozaeta, may komunikasyon na sila sang gobernador bangud ginaaligar nga gina-offeran sang opisyal ang STL operator nga baklon ang franchise sang STL agud indi na ini makaoperar sa probinsiya apang wala sila naghilisugot rason nga ginpaarestar ini.
Sa rebelasyon sang provincial director, halin sa umpisa nga pagpungko sang gobernador wala ini nagasuporta sa kapulisan bangud nga nagapamulitika ini.
Nga gin-admiter man sang gobernador bangud suno sa iya halin sa umpisa luyag na sini nga islan ang provincial director apang wala ini ginhatag ligwa sang Regional Office 12.
