KORONADAL CITY- Ginkilala man sa karon sang Land Trasportation Office ukon LTO 12 ang ginahimo nga implementasyon sang Koronadal City Road Safety and Traffic Management Office agud nga matapna ang trapiko.
Sa esklusibo nga interbyu sang Bombo Radyo Koronadal kay LTO 12 Regional Director Macario Gonzaga, ginpasalamatan sini ang nangin tikang kag inisyatibo sang syudad sang Koronadal sa pagpanguna ni Koronadal City Mayor Eliordo Ogena kag RSTMO Chief Ruel Bagunoc agud nga matapna ang mga naga-upang sa dalagan sang trapiko sa syudad lakip na ang pagpangdakop sa mga colorum nga vehikulo kag ang mga wala sang dala nga nagakaigo nga lisensya, ORCR kag iban pa.
Dako suno pa ini nga bulig agud nga mahagan-hagan ang traffic issues sa syudad.
Samtang, ginpahanumduman man ni Gonzaga ang mga motorista nga dal-on ang tanan nga mga importante nga dokumento ilabi kun magbayahe agud nga makalikaw sa perwisyo kag multa.
Ini bangud posible nga magbayad sang P3,000 tubtob P10,000 ang sinoman nga maglapas sa balaud trapiko.
