KORONADAL CITY- Ginapreprahan na sa karon sang Muslim Community sa South Cotabato ang obserbasyon sang Eid al Adha nga magaumpisa bwas nga adlaw Agosto 11, 2019.
Sa interbyu sang Bombo Radyo Koronadal kay South Cotabato Muslim Affairs Chief Sultan Mutalib Sambuto, yara sa masobra 40,000 ka mga Muslim ang dululungan nga magapatigayon sang obserbasyon sang Eid al Adha ukon Feast of Sacrifice sa probinsya.
Suno kay Sambuto, isa lamang ang Eid al Adha sa importante nga selebrasyon sang mga Muslim kada tuig, magluwas pa sa selebrasyon sang Eid’l Ftr.
Ginapreparahan man ang “kanduli” ukon ang selebrasyon bilang pagpasalamat kay Allah.
Ginpahayag man sini nga alas 7:00 sang aga bwas ipatigayon ang Sambayang ukon pagpangamuyo sa mga moske sa probinsya agud pormal nga buksan ang sagrado nga obserbasyon kag may yara man sang pagsinalo-salo nga matabo.
Nahibaluan nga ang Eid ul Adha ang sakripisyo nga ginhimo ni Abrahan sa pag-halad sang mismo bata sini nga si Ismael kay Allah.
Kaangot sini, gin-awhag man ni Sambuto ang tanan nga Muslim nga ikabuhi ang ipatigayon nga selebrasyon.
