TUPI, SOUTH COTABATO – Ginpasiguro ni Mayor Romeo Tamayo sang banwa sang Tupi nga iya sini paga aksyunan ang reklamo sang mga pumuluyo sang Brgy. Acmonan angot sa mabaho nga piggery farm sang Citra Mina nga sa karon amu na ang Q-Pigs.
Sa interbyu sang Bombo Radyo Koronadal kay Mayor Tamayo, madugay na suno pa nga ginareklamo ang Q-Pigs bangud sa indi maayo nga operasyon sang kumbuyuhan nga nagatuga sang kabaho sa palibot.
Ila man ini gina aksyunan apang liwat naman nga nagatuga sang problema.
Apisar kumpleto sa papeles ang nasambit nga kumbuyuhan nagakadapat nga magsunod man ang mga ini sa regulasyon nga ginapatuman sa pagtatap sang palibot agud nga indi makatuga sang perwisyo sa mga pumuluyo.
Madumduman nga una na nga nagdangop sa waragwagan sang Bombo Radyo Koronadal ang mga pumuluyo sang Acmonan bangud nagamasakit na ang mga ini tuga sang kabaho nga dala sang piggery farm sa nasambit nga barangay.
