KORONADAL CITY – Naglab-ot sa masobra 8,000 STL kag lotto outlet workers sa mga probinsiya sang North Cotabato, Sultan Kudarat kag South Cotabato ang nadulaan sang trabaho matapos ang pagpasirado sang mga lotto outlets sang PCSO base sa mandato ni Pangulong Rodrigo Duterte.
Ini makaligad nga ginpahayag sang pangulo nga ang rason sang iya mandato ang bangud sa malapnagon nga korapsyon sa nasambit nga ahensiya.
Sa interbyu sang Bombo Radyo Koronadal kay P/Col. Joel Limson, provincial director sang South Cotabato PNP, nagapadayon ang ila nga closure operations sa mga STL kag lotto outlets sa probinsya sang South Cotabato.
Ginpahayag man ni Major Joseph Forro, hepe sang Banga PNP, nga yara sa 179 ka STL outlets kag duha ka lotto outlets ang ila nga napasirado sa ila nga area of operation.
Sa subong wala pa sang may napagkit nga kinagamo sa nasambit nga operasyon kun diin wala sang may naabtan nga mga katapu sang outlets ang kapulisan sa nasambit nga crackdown.
