KORONADAL CITY– Desidido nga magsang-at sang reklamo batuk kay Kabus Padatoon founder Joel Apolinario ang panibag-o nga reklamante nga naka invest sang kwarta sa KAPA investment scam.
Nahibaluan nga nagdangop sa waragwagan sang Bombo Radyo Koronadal si alyas Linda, residente sang Koronadal City agud magpabulig sa Bombo sa pormal na nga pagsang-at sini sang reklamo batuk kay Joel Apolinario kag iban pa nga mga may kaangtanan sa KAPA investment scam sa National Bureau of Investigation ukon NBI.
Suno kay Linda, Mayo 2019 kag sini nga una nga semana sang Hunyo, 2019 lamang siya nakahulog sang P100,000 makaligad maengganyo sang bata kag sang pila ka mga suldado kag government officials nga nag invest sa KAPA.
Sa karon dismayado si Linda bangud nagapanago na ang founder kag wala sang kasiguraduhan nga mabalik pa ang ila kwarta.
Nagpanawagan man ini sa KAPA founder kag mga kaupdanan sini nga untaton na ang pag brainwash sa mga miyembro nga maka operate pa ang KAPA bangud klaro nga iligal ang operasyon sang KAPA kag ginpa sarado sang gobyerno agud indi na makapangbiktima pa sang mas madamo nga mga Pilipino.
Top
