KORONADAL CITY – Ginadayo sang madamo nga mga deboto subong nga Semana Santa ang Passion Hill Garden, sa Barangay San Vicente, Banga, South Cotabato.
Ang lugar nga ini ang nahamtang sa anum ka ektarya nga kadutaan nga ginapadulungan sang mga deboto bangud sa ginapatihan nga “healing powers” sini ukon nagapaayo sang mga may sakit.
Sa interbyu sang Bombo Radyo Koronadal kay Louie Mangalos, bata sang tag-iya sang lugar, para indi mabudlayan ang mga may balatian kag tigulang sa pagsaka sa passion hill ginbutangan nila ini sa barandilya nga hinimo sa kawayan.
Suno kay Mangalus, nangin panata na sang ila pamilya nga maghatag sang ligwa sa mga deboto nga may padulungan sa pagpamalandong kag pangamuyo agud makabulig sa pagpabaskog pa sang pagtoo sa Ginoong Diyos.
Madamo nga mga deboto ang nagapatigayon sang pagpangamuyo sa station of the cross kun sa diin makit-an man sa pinakababaw sini ang 3 ka dalagko nga krus nga nagasimbolo sang kasakit ni Hesus.
Nahibaluan nga wala sang bayad ang pagsaka sa lugar kag wala man ang tag-iya nagapakigkumpetensiya sa simbahan.
Sa baylo, ginalaygayan sang tag-iya ang mga deboto nga magabisita sa passion hill nga tapuson anay ang ila mga obligasyon sa simbahan o sa tagsa nila ka parokya antes magpadulong didto.
