KORONADAL CITY – Gilayon nga ginpaidalom sa walo ka adlaw nga temporary lockdown ang apat ka mga purok sa Brgy. Lambayong, Tampakan, South Cotabato makaligad nagpositibo sa covid-19 ang isa ka katapo sang PNP-Special Action Force.
Ini ang ginkumpirmar ni Brgy. Lambayong kagawad Antonio Coy sa eksklusibo nga interbyu sang Bombo Radyo Koronadal.
Kalakip sa mga purok nga ginpaidalom sa nasambit nga lockdown amo ang Prk. Bagong Silang, Pagkakaisa, Mabuhay kag Pag-asa makaligad nag-abot ang pulis sadtong Hunyo 12.
Suno kay kagawad Coy, sa baylo nga magpaidalom ini sa mandatory quarantine humalin sang nag-abot ini sa banwa halin sa Taguig, gin-imbita pa sini ang iya mga himata, pamilya kag mga barkada sadtong Hunyo 15 antes naghalin pakadto sa Malalag, Davao del Sur pagkabuwas.
Magluwas diri, ginbisita man sini ang Brgy. Kipalbig kag Maltana kag nagpadulong pa sa isa ka hardware store sa siyudad sang Koronadal nga tigayon nga ginpaidalom sa contact tracing.
Nagtuga sang alarma kag kahadlok sa nasambit nga mga lugar ang ginhimo sang nasambit nga pulis kun sa diin 14 nga direct contact sini lakip ang iya pamilya ang ginpaidalom sa quarantine nga ginalauman pa nga magdamo pa.
Sa subong hugot nga ginabantayan sang mga barangay officials ang exit points agud malikawan ang paglapta sang nasambit nga balatian.
Nahibaloan nga yara sa masobra 400 ka panimalay ang sakop sang 4 ka purok nga apektado sang nasambit nga lockdown.
