Ginapadayon sang 6th Infantry Division (6ID) Philippine Army ang ila mga operasyon batok sa mga armado nga grupo sa Central Mindanao, samtang ginpahayag nga nagapahuyang na ang presensya sang Bangsamoro Islamic Freedom Fighters (BIFF) kasunod sang pagkapatay sang isa sa ila mga lider.
Sa interview sang Bombo Radyo Koronadal, ginpahayag ni Lt. Col. Ronald Suscano, spokesperson sang 6th Infantry Division, Philippine Army, nga padayon nga ginapangita sang militar ang nabilin nga mga miyembro sang grupo agud mapadayon ang pagpanubo sang ila pwersa.
Samtang, ginpasiguro ni Suscano nga prayoridad sang militar ang seguridad sang mga sibilyan sa tagsa ka operasyon.
Suno sa iya, kabahin sang ila standard procedure ang temporaryo nga pagpabalhin sang mga residente sa luwas nga lugar, kaangay sang evacuation centers ukon barangay gyms, kun may nagaluntad nga military operation sa ila komunidad.
Ginpahayag man niya nga ginapabalik dayon ang mga pamilya sa ila mga puluy-an sa tion nga matapos ang operasyon kag masiguro na ang kahimtangan sang seguridad.
