Ginbawian sang kabuhi ang tatlo ka mga preso lakip na ang isa sa mga prime suspect sa pagpang-ambush kay Lanao del Sur Governor Alonto Adiong matapos nga mainvolbar sa riot sa sulod sang Lanao del Sur Provincial Jail.
Ginkilala ang napatay nga sanday Lomala Baratumo alias Commander Lomala, Alimontaha kag Mimikan.
Madumduman nga si Kumander Lomala ang ginatudlo nga prime suspect sa hana nga pagpatay kay Governor Adiong, Jr., sang Mayo 25, 2023.
Sa subong ginahibalo pa kun ano ang matuod nga ginhalinan sang riot kag ang ginkamatyan ni Lomala.
Naguwa man sa inisyal nga imbestigasyon nga nag-angkon ini sanng madamo nga lagob kag pilas sa nagkalain-lain nga parte sang iya lawas.
Naarestar si Lomala paagi sa ginpaguwa nga arrest warrant ni Presiding Judge Samina Macabando-Usman sang 12th Judicial Region, Branch 8 sa Marawi City.
Madumduman nga nakaluwas lamang si Governor Adiong sa pagpang-ambush apang patay naman ang apat ka mga kaupod sini.
Ang napatay nga si Lomala ang ginakabig nga 5th most wanted person sa Bangsamoro Autonomous Region in Muslim Mindanao.
![](https://img.bomboradyo.com/koronadal/2024/07/Lanao-provincial-jail.jpg)