KORONADAL CITY – Nagakasubo sa karon ang pamilya Oro sa hinali nga kamatayon sang isa ka 3-anyos nga bata matapos nga matumbahan sang nakaparking nga motorsiklo samtang nagahampang sa Purok Sueno, Barangay Morales, Koronadal City, kahapon, Disyembre 3, 2025.
Sa interview sang Bombo Radyo Koronadal kay Ginang Rose Oro, 41, iloy sang biktima, nakibot ini sa natabo sa iya bata ilabi na nga ginpahibalo lamang siya bangud wala ini sa ila balay.
Suno kay Ginang Oro, nagpanglabada siya kahapon gani ang mga utod sini ang nagabantay sa biktima.
Nahibaluan nga ginsugiran lamang siya nga natumbahan sang motorsiklo ang bata kun diin, ginapatihan nga nagsaka ini sa motor kag wala makita ang pagkatumba sini.
Nadala pa sa South Cotabato Provincial Hospital ang biktima apang wala na ini naluwas pa kag ginbawian sang kabuhi.
Nahibalyan nga ikapito sa walo ka mag-utod ang biktima sang pamilya Oro.
Sa karon, ara pa ini sa punerarya kag natalana nga dal-on sa ila panimalay agud didto ihaya.
Masakit man sa pamilya apang ginabaton na suno pa nila ang natabo kag igapangamuyo na lamang ang kalinungan sang kalag sini.
