KORONADAL CITY – Nagapadayon sa subong ang imbestigasyon sang kapulisan sa nagluntad nga pagpangluthang sa banwa sang Banga, South Cotabato nga nagresulta sa pagkapatay sang isa ka babaye kag pagkapilas naman sang isa ka menor de edad.
Sa interbyu sang Bombo Radyo Koronadal kay Police Major Joseph Forro III, hepe sang Banga PNP ang napatay nga si Generose Patino Puyong alyas ini-in, 37-anyos kag isa ka alyas Jean, 12-anyos nga lunsay mga residente sang Barangay Cinco, Banga, South Cotabato.
Suno kay Major Forro, naguwa sa ila imbestigasyon nga samtang ginamaneho sang biktima nga si Generose ang motorsiklo sini kaupod ang isa ka menor de edad kag isa pa ka babaye padulong sa Barangay Hall sang ginsundan ang mga ini sang 3 ka lalaki nga nakasakay sa motorsiklo kag ginluthang sang makapila ka beses ang mga biktima apang ang driver ang target sang mga suspek.
Gindala pa sa South Cotabato Provincial Hospital ang mga biktima apang bangud sa madamo nga igo sang bala nga naangkon ni Generose, ginbawian ini sang kabuhi samtang luwas naman kag nagapaayo subong ang menor de edad nga naigo lamang sa hita.
Kasamtangan namna nga ginapangita sang kapulisan ang prime suspect nga si Paul “Pakwan” Nomananap, 31 anyos nga residente sang Brgy. Lamba, Banga, South Cotabato.
Na-trace ang suspek matapos nga makita ang motorsiklo nga gingamit sa pagpanglythang sa mga biktima samtang ginahibalo pa ang identity sang 2 pa sini ka kaupdanan.
“Love” triangle naman ang ginasundan nga anggulo sang kapulisan sa krimen.
Nagpromisa naman ang pamilya Nomananap nga makigkoordinar kag buligan nga boluntaryo nga magsungka ang suspek.
