KORONADAL CITY – Ginlubong na ang isa ka menor de edad nga napatay sa operasyon sang mga militar sa bahin sang Sitio Kiluding, Barangay Kiadsam, Senator Ninoy Aquino, Sultan Kudarat.
Ginkilala ang sultero kay “Kuni”, 16-anyos nga isa ka myembro sang Manobo-Dulangan tribe kag iskolar sang OMI Indigenous Peoples Mission sa Senator Ninoy Aquino, Sultan Kudarat.
Napuno sang emosyon ang pagdul-ong sa ulihi nga palahuwayan kay Kuni nga gintambungan sang pamilya sini, mga malapit nga abyan, kakilala, mga opisyal kag ang OMI brothers.
Una na nga ginpanginwala sang pamilya sini nga indi siya katapu sang rebelde kundi isa ka ordinaryo nga estudyane.
Ginpahayag sang mga nakasaksi nga nasal-an lamang nga katapo sang rebelde nga NPA si Kuni makaligad nga nagpatigayon sang operasyon ang mga militar sa lugar.
Madumduman nga sa panaysayon gani sang utod mismo sang biktima, naga panglakaton suno pa ang mga ini kaupod nga 2 pa ka mga individual gumikan sa isa ka barangay sang nasugata sang mga ini ang mga katapo sang militar.Sa wala mahibaluan nga rason, hinali na lamang suno pa ang mga ini nga ginpalukpan sang mga militar ,naglumpat suno pa ang 3 sa mga ini kag nabilin ang nasambit nga biktima nga napatay.
Samtang, nagpatunga na ang LGU Senator Ninoy Aquino sa natabo kag ginpahayag nga may amicable settlement na sa tunga sang pamilya sang bikitma kag mga sundalo.
Apang naguwa ang impormasyon nga magapasaka sang kaso ang pamilya sa mga nagpatigayon sang operasyon.
