KORONADAL CITY – Ginbawian sang kabuhi ang isa ka 10-anyos nga bata nga babaye sa Lutayan, Sultan Kudarat matapos aksidente nga naluthangan sang iya 7-anyos nga manghod nga babaye.
Ini ang ginkumpirmar ni Barangay Chairman Celia Avanzado sang Barangay Palavilla, Lutayan Sultan Kudarat sa interbyu sang Bombo Radyo Koronadal.
Ginkilala ang biktima nga si Angel Bliss Pututan, grade 5 pupil kag residente sang Purok Pag-asa, Barangay Palavilla sa nasambit nga banwa.
Suno kay Avanzado, ginhampangan sang mag-utod ang isa ka homemade shot gun samtang yara sa kamalig sang mga ini sa nabukid nga bahin sang Sitio Makapol sa nasambit nga barangay kun diin aksidente nga nalutthangan sang manghod sini sa dughan ang biktima.
Walo ka igo sang bala naman ang naangkon sang biktima bangud sa wala sini gilayon mabuy-an ang armas luthang.
Nahibaluan nga yara sa 100 metro ang kalayuon sang iloy kag step father sang biktima sa kamalig bangud nagapang-utod sang kahoy ang mga ini para himuon nga “uling’’ bilang ila nga pangabuhian.
Apang nabatian na lamang nila nga naglupok ang armas luthang kag sang ginlantaw ang kamalig nagahapa na sa salog ang bata kag duguon.
Gilayon naman nga gindala sa South Cotabato Provincial Hospital ang biktima apang gindeklarar nga dead on arrival sang doctor.
