KORONADAL CITY – Ginbawian sang kabuhi ang isa ka lalaki samtang nakaluwas naman ang kaupod sini sa rock slide, sa Sitio Bentong, Barangay Tasiman, Lake Sebu, South Cotabato.
Ginkilala ang napatay nga si Danilo Manumba, 21-anyos, sultiro, mangunguma kag residente sang Sitio Citi, Barangay Tasiman samtang nakaluwas naman ang kaupod sini nga si Dandan Dawang.
naguwa sa imbestigasyon sang Lake Sebu PNP, nagpasilong ang duha sa kuweba bangud sa mabaskog nga ulan gikan sa pagpangaso sang hinali nga nagragasa ang mga bato.
Nakadalagan pa si Dawang samtang natrap naman sa sulod sang kuweba si Manumba nga gintunaan sang kamatayon sini.
Madumduman nga tuman ka baskog kag madugay ang pagbubo sang ulan kun diin apektado man ang pagbaha sa nasambit nga banwa.
Narekober naman sang mga barangay officials kag mga kapulisan ang bangkay sang biktima.
