Sa edad nga 90 anyos kag magasaulog sang iya ika-91 nga kaadlawan sa masunod nga Enero, ginpaambit ni Corazon Bejimino Elisan ang mga handumanan kag eksperyensya nga nangin importante nga bahin sang iya malawig nga kabuhi.
Isa sa pinakamatam-is niya nga handumanan amo ang 52 ka tuig nga pag-upod nila sang iya bana.
Sa interview sang Bombo Radyo Koronadal gindumdum niya nga bisan siya ang nagpabilin sa balay agud mag-atipan sang ila mga kabataan, wala gid siya ginpabay-an sang iya bana.
Suno kay Elisan, isa sa mga butang nga wala niya malipatan amo ang batasan sang iya bana nga magdala sang pagkaon kada pauli halin sa trabaho.
Para sa iya, simple lamang ini nga pagpakita sang pagpalangga, apang nangin madalom nga handumanan nga nagapabilin tubtob subong.
Dugang pa niya, ang mga eksperyensya sa ila pag-asawahay kag pagpadako sang ila mga kabataan nangin importante nga bahin sang iya kabuhi kag nagpakita sang bili sang paghangop, pag-atipan kag paghiusa sang pamilya.
Sa pihak sang mga pagtilaw kag pagbag-o nga iya naagyan sa kabuhi, ginpahanumdom ni Elisan ang mga pamatan-on nga mangin responsable sa ila mga desisyon kag hatagan sang importansya ang ila kaugalingon kag pamilya.
Nagpanawagan man siya sa publiko nga indi magkahadlok sa kamatayon, kundi magpabilin nga handa kag magpadayon sa pag-atipan sa kaugalingon kag sa mga pinalangga samtang may kahigayunan pa.
