Nag-atubang sa Quezon City Regional Trial Court si Vice President Sara Duterte subong nga aga, Septyembre 5, matapos magpalabas ang korte sang warrant of arrest batok sa iya may kaangtanan sa tatlo ka counts sang grave threats.
Antes kag samtang nag-atubang sa korte, nagpahayag si Duterte sang iya kabalaka sa seguridad, ilabi na sa iya mga kabataan. Suno sa iya, nakabaton siya sang mga dokumentado nga pamahog kag harassment halin pa sang 2023.
Ginpahayag man sang Bise Presidente nga indi siya nagabatyag sang seguridad kag nahadlok nga posible siya patyon. Ini kasunod sang iya alegasyon nga bisan nagkadto na siya sa korte, nagkadto gihapon ang mga pulis sa lugar kun sa diin yara ang iya mga anak.
May pyansa nga P360,000 para sa tatlo ka counts sang kaso nga ginapasaka batok sa iya.
Nag-ugat ang kaso sa ginpahayag ni Duterte sa isa ka press conference, kun sa diin iya ginsiling nga may tawo siya nga nakontak agud ipapatay si President Ferdinand “Bongbong” Marcos Jr., First Lady Liza Marcos kag anay House Speaker Martin Romualdez kon may malain nga matabo sa iya.
Samtang nagapadayon ang legal nga proseso, nangin sentro man sang pagtalakay ang mga pahayag ni Duterte parte sa iya personal nga seguridad kag ang iya kabalaka para sa iya pamilya.
