Nanindugan ang kampo ni Bise Presidente Sara Duterte nga preparado sila nga sabton ang tanan nga alegasyon batok sa iya nga nakalista sa ika-apat nga impeachment complaint.
Suno kay VP Sara nga legal counsel kag tagapamaba nga si Atty. Michael Poa, halin pa sang ginpahayag sang bise presidente nga gusto niya sang “bloodbath,” preparado na ang bilog nga kampo sang tanan nga argumento kag sabat, pinaagi sa buligay sang 16 ka mga abogado.
Ginpabutyag ni Poa nga nagapamati si VP Sara sa kolektibo nga diskusyon sang iya legal team kag nagasunod siya sa ila mga ginahambal.
Sa tunga sang mga espekulasyon nga posible nga may mag-file liwat sang impeachment complaint batok sa bise presidente pag-abot sang Pebrero sang masunod nga tuig, nagapati si Poa nga handa ang bise presidente nga atubangon ang mga alegasyon nga posible liwat nga ihatag.
Suno kay Poa, bukas ang kampo sang bise presidente sa bisan ano nga ihatag batok sa iya, upod na diri ang posible nga oral argument kung ipahanugot ini sang Korte Suprema, matapos ang pila ka motion for reconsideration nga ginpasaka sa korte.
Sa karon, ginapreparar man sang amo nga kampo ang ila sabat sa MR nga una nga ginpasaka sang Kamara de Representantes.
