KORONADAL CITY- Ginkilala na ang bangkay sang isa ka myembro sang LGBT nga nasapwan nga may 3 ka igo sang bala sa iya nga lawas sa Prk. Bagong Silang, Brgy. Tinongcop, Tantangan, South Cotabato.
Sa esklusibo nga interbyu sang Bombo Radyo Koronadal kay Pol. Captain Romeo Albano, hepe sang Tantangan PNP, ginkilala ang biktima nga si Arthur Malayon alyas Ariane, 30-anyos kag residente sang Lampitak, Tampakan, South Cotabato.
Suno kay Albano, ginclaim na sang pamilya sang biktima ang iya nga bangkay makaligad nga makit-an ini sa posts sa social media pinaagi sa Bombo Radyo Koronadal.
Nagagwa naman sa inisyal nga imbestigasyon sang PNP nga nagpadulong sa syudad sang Koronadal ang biktima agud nga makigkita sa iya suno pa nga textmate apang wala man suno pa sang ihibalo ang pamilya kun sino ang persona nga kadtu-an sini.
Ginpahayag man suno pa sang pamilya Malayon nga lunsay kwarta kag keypad lang nga cellphone ang dala nang biktima sa iya nga paghalin sa ila nga balay.
Samtang, dako naman suno pa ang posibilidad nga ginhaboy lang sa Tantangan ang bangkay sang biktima bangud halos nagtig-a na ini sang masapwan sang isa ka pumuluyo.
Wala na suno pa sang narekober nga personal nga pagkabutang sa biktima sang ini ang ginsekyar sang mga otoridad.
Nahibaluan nga halin sa bala sang caliber 45 ang gin-usar sa pagpatay sa biktima.
Sa karon, nagapadayon ang imbestigasyon sang PNP sa nasambit nga insidente.
