Ginkumpirma ni Ukraine President Volodymyr Zelensky nga naigo sang operasyon sang ila militar ang duha ka oil refinery sa teritoryo sang Russia.
Ginpahayag ni Zelensky nga ang Defense Forces sang Ukraine ang responsable sa pag-atake sa Slavneft-Yanos refinery sa Yaroslavl kag Bashneft-Novoil refinery sa Bashkortostan.
Ang mga pasilidad ini may importante nga papel sa pagproseso sang krudo kag suplay sang gatong, gani ginakabig nga estratehiko nga target sa tunga sang nagapadayon nga giyera sa tunga sang duha ka pungsod.
Ginpahayag man sang Ukrainian leader nga na-igo sang ila pwersa ang duha ka military patrol boats kag pila ka barko nga ginakilala bilang kabahin sang shadow fleet sang Russia sa Black Sea.
Samtang, ginpahayag ni Yaroslavl Governor Mikhail Evraev nga ginpatibusok sang ila pwersa ang Ukrainian drones nga nagsalakay sa rehiyon.
Apang bangud sa debris halin sa mga drone, nagluntad ang sunog nga nakaapekto sa tatlo ka kabalayan.
Ginkumpirmar man sang gobernador nga may apat ka indibidwal nga napilasan bangud sa shrapnel, apang wala sang may napatay sa amo nga insidente.
Sa karon, padayon naman ang pagmonitor sang mga otoridad sa epekto sang pag-atake kag sa posible nga dugang nga operasyon sa amo nga lugar.
