Ginakabig nga balido ang tikang nga ginhimo sang mga senador sa pag-ilis sang posisyon sang Senate President Pro-Tempore kag ang pag re-assign sang mga committee chairmanship sa sulod sang mataas nga kapulungan sang Congresso bangud naabot ang quorum sa numero sang mga ini nga 12.
Sa interview sang Bombo Radyo Koronadal ginpanindugan ni Ret.Judge Lorenzo Balo- Provincial legal adviser sang Sultan Kudarat nga valid ang nangin tikang sang 12 ka mga senador sa diin ginabig sang mga ini nga quorum ang numero nga dose sa pagmosyon sang pag-ilis sang nasambit nga posisyon.
Suno kay Balo, 12 ang quorum sang mga senador bangud 22 lamang ang mga senador nga ara sa “reach” sang senado sa diin wala nalakip sa numero sang mga senador si Sen. Jinggoy Estrada nga yara sa kostudiya sa subong sang mga kapulisan bangud sa kaso nga plunder samtang si Sen. Dela Rosa nga ginakabig nga pugante kag wala sa “reach” sang senado kag indi na ma compel nga magtambong sa session sang senado.
Dugang pa sini nga madamo na sang tion nga nagdekalarar sang qourum sa numero nga 12 apisar pa sa mga journal entries sang senado may mga records na kag may mga panghitabo nga 12 ang qourum nga numero sa diin isa man sa mga instances sini ang nasaksihan sang mga incumbent nga mga senator nga sanday Loren Legarda kag ang mag-utod nga Cayetano.
Sa tion naman nga paga islan ang Senate President ginakinahanglan nga makuha ang majority vote nga 13 sa plenaryo agud nga maislan ini.
Sa subong suno kay Balo ang kasamtangan nga acting Senate president amu naman sang Senate president Pro-Tempore nga si Senator Sherwin Gatchalian.
Madumduman nga hinali nga pagpakita ni Sen. Francis “Chiz” Escudero sa plenary session sang Senado naghatag sang dalan para sa pagporma sang quorum kag pagproklamar kay Senador Sherwin Gatchalian bilang bag-o nga Senate President Pro Tempore sang Senado.
Matapos nga naatrasar sang duha ka adlaw ang session bangud sa majority boycott, nagtambong si Escudero kag nangin yabi sa pagbalik sang normal nga operasyon sang Senado.
Sa boto sang mga senador nga nagtambong, si Gatchalian ang napilian bilang Senate President Pro Tempore nga nagtal-os kay Sen. Loren Legarda.
