KORONADAL CITY – Tigayon nga ginpaidalom sa tatlo ka adlaw nga pre-emptive lockdown ang tatlo ka barangay sa banwa sang Polomolok, South Cotabato makaligad nakapagkit sila sang pinakauna nga kumpirmado nga kaso sang coronavirus disease.
Ginalakipan ang mga ini sang mga barangay sang Lumakil, Magsaysay, kag Rubber nga amo ang ginhalinan sang nasambit nga positibo nga kaso.
Sa interbyu sang Bombo Radyo Koronadal kay Polomolok Mayor Honey Lumayag-Matti, ginpahayag sini nga ginhimo nila ang nasambit nga tikang agud mapadasig ang contact-tracing makaligad nagguwa nga positibo ang swab test result sang 25 anyos nga lalaki nga una nga ginpaidalom sa isolation antes tigayon nga na-discharge.
Ginpahayag ni Mayor Matti nga gilayon nga ginsugat nila pinaagi sa Municipal Health Office ang nasambit nga pasyente kag gilayon nga ginpaidalom sa isolation kag nagpatigayon sang contact tracing.
Nagguwa naman nga negatibo ang resulta sang iya pamilya sang ginpatigayon ang rapid testing sa ila.
Dugang sang nasambit nga alkalde, nakadepende sa mangin resulta sang contact tracing ang desisyon kun kinahanglan pa ini nga palawigon.
Padayon man ang ila pagtumod sa travel history sang nasambit nga pasyente.
