KORONADAL CITY – Natumod na sang kapulisan ang mga suspek sa nagluntad nga pagpasigabong sang granada sa Villa Garde KTV Bar, Brgy. Buenaflor, Tacurong City nga nagresulta sa pagkapatay sang 2 ka tawo kag pagkapilas naman sang 17 ka iban pa.
Sa interbyu sang Bombo Radyo Koronadal kay P/Supt. John Patrick Agabao, hepe sang Tacurong City PNP, may mga persons of interests na sila nga ginasundan kag sa pagkamatuod ginpaidalom na sa interogasyon agud nga maberipeka ang motibo sa nagluntad nga pagpasigabong.
Apang, nagpamalibad anay si Agabao nga ipahayag ang identity sang mga suspek sa natabo nga explosion.
Suno pa kay Agabao, dako ang posibilidad nga ang away nga nagluntad sa sulod sang KTV bar ang rason sang pagpalupok sang granada kun diin isa ka CVO kag sibilyan ang ginbawian sang kabuhi.
Kaangot sini, nagpanawagan ang pamilya sang mga napatay nga sanday Dominador Abol Datahan nga residente sang Brgy. New Isabela Tacurong City kag Suharto Ayuna Ali, nga residente sang Guindulungan Maguindanao nga mapasabat ang may kahimyan sang pagpasigabong.
Sa subong, 7 sa 17 ka mga pilason na lamang ang nagapaayo sa balay bululngan.
Aminado naman si Agabao nga patuloy ang ila nga pagbantay kun diin naka-heigtened alert status man ang bug-os nga siyudad sa posibilidad nga panibag-o nga pagpasigabong sa ila nga lugar.
