KORONADAL CITY – Kritikal subong ang kahimtangan sang isa ka 68 anyos nga tigulang bangud makaligad nangin biktima sang mga children in conflict with the law (CICL) sa bahin sang Mabini St. Brgy. Zone 4, Koronadal City.
Ginkilala ang nasambit nga biktima nga si Epifanio Bedoya kag residente sa nasambit nga lugar.
Suno kay Brgy. Zone 4 Kagawad Apaitan Macariola, ang Chairman of Committee womens family and children, nagluntad ang insidente kaina sang kaagahon sang nagbakal ang isa ka boarder sang duha ka ilimnon kun sa diin ginhatag niya ang isa sa mga ini sa mga kabataan nga ginapangunahan sang isa ka alyas Uk-uk sa bahin sang Ilaw Building nga malapit sa patyo.
Kag sang natapos na sila sa ila pag-inom-inom gilayon nila nga ginpadulngan ang ginapuy-an ni Bedoya kag ginlampusan sang bote.
Nakaangkon ini sang mga pilas sa lawas labi na sa iya nga ulo.
Gilayon naman nga nagpalagyo ang mga suspek makaligad ang ginhimo nga pag-asulto sa nasambit nga tigulang.
Sa subong nagapaayo na si Bedayo sa isa ka balay bulolngan sa General Santos City makaligad ang natabo.
Nahibaluan nga ang nasambit nga mga CICL ang nakapalagyo halin sa Bahay Pag-asa sang DSWD.
Tuman man nga ginkaalarma sang pila ka mga pumuluyo sa Brgy. Zone 4 ang nagluntad nga pagpang-atake sang mga children in conflict with the law (CICL), ilabi na nga ginatarget ang mga senior citizens..
