Opisyal na nga napahalin sa 2026 FIFA World Cup ang isa sa mga ginakabig nga powerhouse teams nga Senegal matapos ang impresibo nga comeback sang Belgium, nga nagdaog sa score nga 3-2 sa ila nga hampang sa Seattle Stadium.
Una nga nag-angkon sang abanse ang Senegal pinaagi sa goal ni striker Habib Diarra sa ika-25 nga minuto, antes ginpasunod ni Ismaïla Sarr ang ikaduha nga goal sa pag-umpisa sang second half sa ika-51 nga minuto, nga naghatag sa ila sang 2-0 nga advantage.
Bisan padayon ang mabaskog nga depensa sang Senegal, nabaliskad ini sang mga substitute players sang Belgium sa katapusan nga bahin sang hampang.
Sa ika-86 nga minuto, nakaiskor si Belgian midfielder Romelu Lukaku sang una nga goal para sa Belgium.
Tatlo lang ka minuto ang nagligad kag ginpasunod ni Youri Tielemans ang equalizer pinaagi sa isa ka header nga nagdala sang hampang sa extra time.
Samtang nagapaabot ang tanan sang penalty shootout, nagluntad ang kontrobersyal nga VAR review bangud sang isa ka goal attempt. Matapos ang pagrepaso, ginhatagan sang penalty kick ang Belgium.
Wala magsipyat si Tielemans sa iya sipa sa ika-125 nga minuto sang hampang, nga naghatag sang 3-2 nga kadalag-an sa Belgium.
Ang amo nga goal ginakabig subong nga pinakahuli nga game-winning goal sa maragtason sang FIFA World Cup.
Bangud sang ila kadalag-an, maga-atubang ang Belgium sa Team USA sa Round of 16.
